ShaMs

"و بقول كلام موزون, القى الصدى يرجع كلام دايخ"

Monday, November 28, 2005

تنويعات على لحن غسالة

اللحن الرئيسي: زياد رحباني بيغني .. أنا مش كافر
اللحن المصاحب: غسالتي الصغيرة اللي "مش-أتوماتيك" بتزن

رغم رغوة الموقف .. مش عارف ليه الفكرة بتنط من دماغي

أنا بحبك أوي

قليلة المرات اللي سمعت فيها الجملة دي

جدتي .. قالتها مرة .. ساعتها خفت .. و ماعرفتش ليه .. ماتت بعدها بيومين

هي .. قالتها مرة .. و ساعتها برضو خفت .. مالحقتش أعرف ليه
بعدها بيومين قالتلي: مش عايزه حبك و مش عايزاك تحبني

و إنت .. قلتيها انهارده .. مش عايز أعرف ليه .. لكن انهارده أنا مش خايف .. و مش هاقعد أفكر يومين

بس عايز أقولك

إنك لما بتحصلي .. بتكون أجمل حاجة بتحصل في الدنيا

اللحن إتغير: زياد بيغني .. بلا ولا شيء, بحبك
و الغسالة لسة بتزن

Friday, November 18, 2005

مبعثرات

سائرا بين التفاصيل اتكأت على مياه فانكسرت

سائرا بين تفاصيله, تفاصيل تجربته, حدود التجربة
حدود الحلم
حدود الاكتمال

سفر

و أعد أضلاعي فيهرب من يدي بردى و تتركني ضفاف النيل مبتعدا

على ترانيم بردى يذكر
كم أحب التسكع على رائحة النيل .. على ضفاف القاهرة .. كم افتقد هذا العتيق بأحضان بردى

حب

أحبها ليتركها .. ثم أحبها .. فتركها
ثم عاد

مظاهرة

أقبل صمت هذا الملح

هتاف .. ركض .. صرخات .. التفاف .. عودة إلي نقطة البداية
فيعلو الصوت من جديد

أنساك أحيانا.. لينساني رجال الأمن

حلم

صاعدا نحو التئام الحلم
تتخذ التفاصيل شكل كمثرى


تنبعج .. مكورة .. متمردة .. لكنها دائما .. زلقة

غني قليلا يا عصافير فاني كلما فكرت في شيء بكيت

وسط الدموع .. يحلم
يقلب صفحات ذاكرته .. يستحضر اليوم
تسعده ابتسامتها الحنونة
هروب عينيها إلي البحر

يداعبه صوتها ..تصرخ و في عينيها حنق الأطفال
لا أستطيع الطيران, أريد طيرانا

يتضرع .. يبتهل .. يهمس
في محراب الدفء .. يتمتم مبتسما
أنت أفضل ما قد يحدث في حياة

يا امرأتي الجميلة تقطعين القلب و البصل الطري
و تذهبين إلي البنفسج
فاذكريني ..قبل أن أنسى يدي


الأشعار أغلبها لمحمود درويش بصوت مرسيل خليفة و أميمة




Monday, November 14, 2005

سؤال أو أسئلة

مش عارف .. بس يبدو كده إن التجربة هي الحاجة الوحيدة اللي بتقول ممكن ولا مش ممكن

دي كانت اجابتي .. لما يسرا -صديقتي الجميلة أوي- سألتني

هو ينفع يكون حد عنده نفس الفكرة عن الحرية
نفس الاحترام للبني ادميين
نفس اللا تقليدية
عارف أنا بحلم بإيه
و عنده كتير من الخيال المشترك
يسمعني من غير ما أنطق
و يحاول يحل مشاكلي من غير حتى ما نتكلم أو نفكر في حلها
ينفع يكون حد جميل بالشكل ده .. و يكون مناسب بالدرجة دي
بس مابيسمعش منير ولا فيروز أو ما بيحبش جاهين مع انه عنده نفس المعاني اللي أنا بوصلها أنا لما أسمعهم أو أقراهم

يعني هو الاصل هنا فين
المناسب مين

اللي يكون مناسب لأحلامنا
ولا أفكارنا
ولا فنوننا ولا ظروفنا ولا تربيتنا
انه يكون بيسمعنا و يفهمنا
ولا يكون بيحس بينا و بيعرف يحل مشاكلنا
ولا هو اللي يوافقوا عليه أهلنا
انه يكون عنده متاعبنا ولا يكون عنده كتير من ده كله بس برضه مش زينا

و لو البشر أنواع أو أصناف
و فشلنا مرة أو ما كملناش
بيقى ده نوع اتشال من حلمنا
أو صنف ما ينفعش للي زينا
يعني لو كنا ما عرفناش نكمل مع اللي كان بيمثلنا كل أو أغلب معاني الحياة الجميلة

يبقى الحياة .. مش ممكن تبقى جميلة
مش ممكن يوم تضحكلنا

The 7 Things Game

عايز .. أو نفسي

أفكر كويس قبل ما أحب تاني
ألعب مزيكا كتير زي زمان
أركز في القراءة أكتر شوية
أتعلم افتكر اللي الناس عملوه في
أتعلم اقاوم الشوكولاتة
أقضي شهر عسل برة مصر بدل تكاليف الفرح
الاقي حد يستحملني أكتر من سنة


أعرف .. أو أقدر
أشتغل يومين متواصلين .. و معملش أي حاجة يومين متواصلين
أمشي و أسوق مسافات غير منطقية بالمرة
أوهم نفسي إني كويس .. و أصدق
أكدب (بإحكام) .. على الناس اللي تستاهل يتكدب عليها
أضحك يومين متواصلين .. و أكشر اليومين اللي بعدهم
ماتكلمش لأكثر من يومين
أحتفظ بهدوئي و إبتسامتي لدرجة تجيب للي قدامي الضغط


ما بعرفش
أحضن أو أتحضن
أنام من غير غطا
ما أقولش كل اللي على بالي .. حتى و أنا مدرك العاقبة الوخيمة
ما أقلقش على اللي بحبهم
أبطل فرجة على الناس و أنا سايق
أتكلم مع واحد صعيدي أكتر من 10 دقائق
أسكت لو لقيت واحدة أعرفها محلوة شوية


بقول كتير
و إيه كمان .. لحظات ما بعد الكلام
زربو .. تسمية أي حاجة مكسل أقولها و دي عدوى
*** بالاسكندراني
فاساكونيا .. ده وصف أي حاجة مش مضبوطة في الحياة و الأكل
في الإسكلتش .. ده وصف أي عك في الشغل
الفكرة مش كدة
إنت يا كفتة .. لأي حد في الدنيا


و دول عايزهم يقولوا اللي زي اللي أنا قلته
يسرا www.youssra.blogspot.com
سارة www.sarahawary.blogspot.com
دينا www.dinahawary.blogspot.com
كريم .. ده قال خلاص
فاضل تلاتة هاتعرف عليهم قريب

Tuesday, November 08, 2005

شكرا

ألو .. دكتور محمد .. مساء الخير

مساء النور يا جاسر ازيك

و بعد السؤال عن الأحوال و تهاني العيد

عاوز أقولك يا دكتور على حاجة غريبة حصلت انهارده
انهارده كنت مع بنت جميلة صديقتي أوي
و كمان أصحابها في الكلية
منهم اللي شفته قبل كده
و منهم اللي أول مرة
بس حسيت وسطهم كلهم بالدفا, الألفة و السكينة
ناس جميلة أوي
قعدنا ع السلم
عنينا و ضحكنا
زعقنا .. كأني كنت بجري و اتنطت
انبسطت أوي وسطهم
و اتكلمت كتير .. كتير أوي

و ايه الغريب في ده كله يا جاسر

الغريب يا دكتور ان صوتي ما تعبنيش
ما حستش بالألم المعتاد بعد كل قاعدة طويلة أو قصيرة
ما حستش بالوجع بتاع كل أجازة
و فضلت أغني
من ساعت ما سبتهم و أنا بغني .. بغني بصوت عالي
معقول يا دكتور يكون الألم كان مجرد حالة نفسية مش أكتر, رغم الفحص اللي أكد ان في التهاب في الأحبال الصوتية

يا جاسر .. أنا قلتلك قبل كده ان أغلب أوجاعنا نفسية
الالتهاب مؤقت
و الحالة النفسية كمان لازم تكون مؤقتة
لكن المهم انك تكون صدقت و لقيت العلاج

جاسر .. ما تنساش تشكرهم أوي
أشكرهم على جمالهم اللي خلاك تغني من تاني
أشكرهم على كل ضحكة ضحكتها كانوا هم سبب فيها

Wednesday, November 02, 2005

الجرح

يا مسأسأ الصبر فوق الجرح
من بره
الجرح يا عم جايب دم
من جوه


أحمد فؤاد نجم