ShaMs

"و بقول كلام موزون, القى الصدى يرجع كلام دايخ"

Saturday, May 20, 2006

سلامات

إزاي يحسبوا عمر اللي عايش من الأموات
يعني السنة عندك ميلاد .. ولا هجرة .. ولا مسافات

من سنة كلّمتك .. في عيد ميلادك برضه .. تليفونك كان مفتوح
بس قالولي
إزاي و إنت هنا وسطينا .. يقولوا عليك .. ده مات

ماعرفش عندك بيقولوها إزاي .. لكن
كل سنة و إنت طيب .. بعمر الأحياء

فاكر الواد إيهاب الأصلع .. اللي كان مرضان
بيقولوا برضه مات
شفته؟ و هو طالع السموات

الواد مايكل لسة في أمريكا .. كلّمني من كام يوم .. بيقول مبسوط
كريم و يحيي و هاني .. إتجوزوا
جليلة سافرت .. و ريهام إتخطبت زي كل البنات

فاكر البت ياسمين؟ الشحّاتة .. أم عيون عسلية و إيدين ناعمة
سألتني عليك
الأبيضاني اللي كان يديني الجنيه .. و يبحلقلي بعشرة

انا حبيت بعدك واحدة مثقفة
اكّلتها م الفتة بتاعتنا .. و حكيتلها عنّك
مافهمتش إني بقولها كلام حب

فاكر الدكتورة أم رجلين حلوة .. جالها سرطان
يمكن تجيلك عن قريب .. إبسط يا عم

على فكرة أمّك بتسوق عربيتك
أنا قلت أقولك .. أحسن تكون مش عارف

فاكر قهوة الباشا .. قعدة نص الليل .. و خناقة السكان
قفلوها .. قال إيه .. عندنا بنات

فاكر يا أحمد
ولا أنا اللي باحلم

يعني إنت كنت معايا في الوقت اللي فات
ولا إنت من زمان .. في عالم الأموات

يا أحمد .. وحشتني

من وسط الأحياء .. بابعتلك سلامات

14 Comments:

Post a Comment

<< Home