ShaMs

"و بقول كلام موزون, القى الصدى يرجع كلام دايخ"

Monday, July 25, 2005

أنا كنت في شرم الشيخ

أنا كنت هناك

الساعة 12 كنت في فندق غزالة, كنت أنا و وليد زميلي, كان بيغير دولارات من بنك هناك
بعد ربع ساعة وصلنا السوق القديم, عشان نجيب عشا و نشرب قصب

بعدين ركبنا من الموقف (اللي كان موقف) عشان نطلع الهضبة -الفيللا بتاعت الشركة هناك
كنا بنعمل كبدة اسكندراني أنا و حسام و وليد و فتحي و أنور

الساعة 12:45
هي كلمتني
هي عندي زي مصر
رقتها, أحلامها,ضحكتها,و كمان أحزانها
كنت عاوز أصرخ و أقولها محتاجلك .. معرفتش
كنت عاوز اقولها بحبك .. برضو معرفتش

هي لسة معايا ع التليفون
الساعة 1:13

الفيللا اتهزت
صوت قوي جدا
الشبابيك اتفتحت
و القزاز خبط في بعضه
هي كمان سمعت الصوت, زي ما كل مصر سمعت الصوت
جريت على الشارع, لقيت كل الناس في الشارع
مصريين و أجانب

قالوا محطة بنزين انفجرت .. قلت يا رب
قالوا ده مستودع غاز .. برضو قلت يا رب
كان احساس غريب أوي
بقول يا رب تطلع أي حادثة بس مصر ماتضعش من ايدينا
كان غريب اني في لحظة اتمنيت تكون أي كارثة نضيع احنا فيها

لكن هي لأ
لكن لما سمعنا صوت الاسعاف و عرفنا اللي حصل اتأكدت انها ضاعت من ايدينا
جريت عشان أكلمها تاني

خفت تكون هي كمان ضاعت من ايديا
لكن لما سمعت صوتها .. بكيت

كنت عاوز أقولاها خليكي جنبي .. معرفتش
لكن هي سمعت صوتي من غير ما أتكلم

يا ترى يا مصر سامعة صوتنا
عارفة احنا بنحبك و بنخاف عليكي اد ايه
عارفة ليه كنا بنقول يا رب لما سمعنا الانفجار
و عارفة ليه قلنا برضو يا رب بعد الانفجار


مش هقدر أقول حسيت ب ايه لما نزلت بعد يومين السوق عشان أشوف مصر أخبارها ايه
مش هعرف أوصف المنظر كان عامل ازاي
لكن كان في اللي اهم كتير من الصور و الناس اللي في المستشفي

رائحة الموت

كانت أول مرة ابقى قريب من الموت كده
أول مرة أعرف ان الموت له ريحة
ريحة صعب أوي تتنسي
صعب تتوصف
لكن كانت حقيقة
و الأشلاء فالشارع كمان كانت حقيقة
الكارثة كانت حقيقة
الموت كان حقيقة
و الخراب كمان كان حقيقة

و لسة الحقيقة عايشة
بس يا ترى ليها صوت

بحبك و بحب مصر
خفت عليكي و بخاف أوي على مصر
عايز اعيش جواكي
جوا مصر

4 Comments:

  • At 1:36 PM, Blogger YouSy said…

    7amdelah 3ala salamtak ya gasser ..

     
  • At 1:52 AM, Blogger YouSy said…

    gasser .. el kalam da met2al men el alb awi ..3ashan keda wesel lel 2alb awi awi ..

    mesh adra 2a2olak kalamak da hazeny ad eh ..

    Rabena yekhaly masr leena ..we yekhaleena leeha law lessa 3ayzana ..
    we ye7fazha ..we ye7faz kol el masreyeen isA ..

     
  • At 10:08 AM, Blogger moe said…

    سلامتك الف سلامة

     
  • At 10:56 PM, Blogger AZ said…

    .

     

Post a Comment

<< Home