نفسي

نفسي .. أعرف أقولك أي حاجة أكتر من ازيك .. عاملة ايه
أقولك ربع الكلام اللي بكون عايز أقوله
مش عارف ليه مابنعرفش نتكلم في التليفون زي و احنا مع بعض

نفسي .. أسمعك بتغني "طيري يا طيارة" عشان بترن في وداني كل ماتكلم معاكي
عشان و أنا معاكي بحس اني طفل صغير مش عايز يكبر

نفسي .. أكون جنبك وانت سايقة من غير ماتشوفيني .. نفسي أسمع صوتك وانت لوحدك

نفسي .. أصحى من نومي الاقيكي بتكلميني .. عشان بقالي كتير أوي باصحى وانت على بالي

نفسي .. تقابلي حد حكيتله عنك .. بيقولولي.. انت قليل لما بتكون فرحان كده وانت بتتكلم عن حد
لو تعرفي قد ايه مهم اني أطمن عليكي

نفسي .. أسمع صوتك لما أكون محتاجه .. ليه دايما بتكوني بعيدة

نفسي .. أسمعك وانت بتكلميه .. لما بتسلميله ايديكي عشان يطلع مزيكا من قلبه