أمان

الغردقة - شارع شيراتون
فرشة عم حسين بتاع الجرايد
قبل صلاة الجمعة بدقائق

من بعيد, مفيش حد حولين الفرشة
الناس رايحة جاية في الشارع
سياح .. بيتفرجوا ع الناس اللي بتصلي
شباب يادوبك صاحيين م النوم
نسوان لسة مستحمية بعد سهرة الخميس

فين عم حسين
لازم أجيب الجرنال قبل الصلاة

وصلت عند الفرشة
الأهرام المتختخ واخد في حضنه كيس أسود بلاستيك
سحبت الجرنال من تحت الكيس, أتاريه كيس الفلوس بتاع عم حسين
مليان فلوس
حطيت الجنيه و ربع جوة الكيس, الكيس تحت الطوبة و الجرنال تحت باطي و مشيت
و انا راجع لقيت عم حسين
راجل صعيدي ضخم بجلابية و عمة

يا عم حسين, سايب الفرشة و الفلوس و رايح تصلي
يابني الدنيا أمان, ده أنا كنت عند ربنا
أفكر في الفرشة ليه